من اين جاءنا البيان التالى؟؟؟

الصورة دى انتشرت اليومين اللى فاتوا على كل صفحات الفيس بوك والناس ابتدت تعلق عليها بسخرية شديدة من هيئة الامر بالمعروف ومحدش خد باله من كلمة "على موقع التواصل الاجتماعى تويتر"والحقيقة ان هيئة الامر بالمعروف ليس لها علاقة بالبيان ده لكن الموضوع مش موضوع الصورة دى الموضوع اكبر من كده احنا بقينا نصدق اى حاجة تتقال واى صورة تتنشر ونبدأ نتحمس والتعليقات على الصورة تبدأ تسخن وممكن توصل لالفاظ خارجة.

الصورة دى احد الصور اللى نشرت ليلة مذبحة بورسعيد على انها صورة احد ضحايا الالتراس على اساس انه لابس تى شيرت احمر الا ان بشاعة الصورة خلتنا كلنا منركزش فيها واتضح بعد كدا انها فى اليمن مش فى مصر اصلا وصور تانية زى دى كتير

المقصود اننا بقينا بننساق وراء الشائعات من غير منفكر واول حاجة بنعملها اول مانسمع خبر او نشوف صورة نعمل شير بسرعة علشان نوريها لكل اصحابنا ونشوف البوست ده هيجيب كام لايك من غير منفكر فى صحة الكلام و فى دقائق ينتشر الخبر على الفيس بوك وتويتر وتانى يوم ينزل فى الجرايد لان بقى فى صحفيين كسالى مبيجروش وراء الاخبار واصبح الفيس بوك وتويتر هو مصدرهم الاساسى لاى خبر زى الخبر بتاع هيئة الامر بالمعروف.... 

والسؤال هل اصبحت رؤيتنا ضيقة لهذه الدرجة ؟؟؟ هل اصبحت الحياه فيس بوك وتويتر بالنسبة للعديدين ؟؟؟ 

الغريبة ان معظم مستخدمى تويتر كانوا ضد الاخوان ومع ذلك فازوا بأغلبية مقاعد البرلمان !!وايضا كان اغلب تصويت اغلب مستخدمى الفيس بوك ب"لا"على التعديلات الدستورية ومع ذلك كان تصويت الشعب بنعم ... والان اغلبية المستخدمين مؤيدين للعصيان المدنى والناس فى الشارع اغلبهم يرى فى العصيان ضرر بمصالح البلد ووقف للعجلة الانتاج "اللى مدارتش اصلا من سنة 52تقريبا"اذا تويتر وفيس بوك بعيدين عن رأى الشارع يبقى ازاى نستخدمهم كمصدر للاخبار فى حين انهم مواقع تواصل اجتماعى مش اكتر؟؟؟

بس السبب ورا كده هو التضليل الاعلامى المستخدم من قبل التليفزيون المصرى والفضائيات اللى محدش عارف مصادر تمويلها ولا مين اصحابها

يعنى لو فكرت تعرف مدى صحة خبر زى "الداخلية تستخدم الخرطوش لتفريق المتظاهرين امام الوزارة"لو فتحت التليفزيون المصرى هتلاقى "عاجل:وزير الداخلية ينفى استخدام الخرطوش"وهتلاقيهم مصورين اطفال الشوارع وهم بيضربو العساكر بالطوب والادهى انهم يجيبوا عساكر امن مركزى مضروبين بخرطوش من المتظاهرين ولو فتحت الجزيرة هتلاقى "صورة مباشرة للمظاهرات امام وزارة الداخلية "ومصوريين مع متظاهرين مضروبين خرطوش او ماسكين فوارغ بتاعت رصاص حى مع ان الفوارغ بتقع تحت رجل اللى بيضرب بس ما علينا اما بقى لو فتحت سى بى سى فمرحبا بك فى المستقبل هتلاقى لميس او خيرى بيتكلموا عن مبنى معين تعرف على طول ان المبنى ده هيولع بكرة

طب نعمل ايه؟؟؟؟نقفل التليفزيون خالص ونفتح تويتر علشان الناس اللى قدام الوزارة كل شوية كده بيبعدوا عن الضرب علشان يتويتوا ويقولوا كل اللى بيحصل من قلب الحدث نفسه وهى دى الطفرة الاعلامية اللى وصلنلها

وبالحديث عن الطفرات الاعلامية افتكرت حاجة مهمة جدا تانى يوم بعد مذبحة بورسعيد طلع "أجرأ مذيع "فى التليفزيون المصرى ابراهيم عبد الجواد "مستر ايجيبت سابقا"وقال كلمتين يستاهلوا نرفعله القبعة ونحييه علشان كان باين انه بيقولهم من قلبه مش تمثيل وطلع خبر بعدها انه اتوقف واتحول للتحقيق وبعدين طلع تكذيب للخبر مش مهم اتوقف ولا لا المهم ان الناس اللى بيشتغلو فى التليفزيون لسه عندهم بواقى ضمير

بس فى ناس تانيه معندهاش وطلعت ضحايا المذبحة مش شهداء علشان تافهين سايبين اللى وراهم واللى قداهم ورايحين قال ايه يتفرجو على ماتش كورة لما تقابل ربنا منك له هتقولو ايه.....

ولهذا الاعلامى اللى كلنا عارفينو المشهور بزبيبة الصلاة اللى واكلة نص وشه احب اسأله سؤال هو والد حضرتك واخد الجنة والنار ايجار ولا تمليك ؟؟؟؟ 

مين طفى النور؟؟؟

اللى احنا فيه ده بيفكرنى بفيلم "الف مبروك"بس الفرق ان احمد حلمى كان بيعيد اليوم احنا بنعيد السنة . 
من سنة بالضبط حصلت موقعة الجمل وفى نفس التاريخ تحصل مذبحة الالتراس والغريب ان الالتراس دول هم اللى كانو بيحموا الناس فى موقعة الجمل يبقى اللى حصل ده مالهوش غير تفسير واحد "انتقام ربنا"طبعا الشباب الوحشين دول تسببوا فى فشل موقعة الجمل
بس ضحايا موقعة الجمل كانوا 13 فى 20 ساعة  لكن ضحايا مذبحة الالتراس 76 فى اقل من ساعة........ وده يوصلنا لان الشهداء اللى سقطوا فى ظل حكم العسكر عددهم أضعاف اللى سقطوا فى ظل حكم الرئيس السابق 
بس طبعا مش المقصود ان العسكر عاوزين يخلصوا علينا ولا حاجة لأ خالص العسكر مش هما اللى قتلوهم ده الطرف الثالث اللى كل مرة بيلبس طاقية الاخفى وينزل على اى حتة فيها ناس كتير متجمعين و يقعد يصطاد بالبندقية بتاعته يمين وشمال
يجيب مرة عين ده مرة دماغ ده اصلوا زهق من البلاى ستيشن فقال ينزل يلعب جيمز واقعية والمره دى كان رايح الاستاد يلعب فيفا مكنش قصدو يقتل ولا حاجة بس هى جت كده بقى يظهر الجيم هنّج منه ودخل على لعبة تانيه غير الفيفا 
بس الناس الوحشيين اللى غاويين يلزقوا اى حاجة بتحصل فى العسكر والداخلية ممكن يقولو ليه قوات الامن المركزى تراجعت من امام المدرجات وسابت الجمهور الغاضب "علشان فريقه كسب 3\1" ينزل و يجرى حوالى 150 متر ويوصل الناحية التانية من الاستاد علشان يمسك شريف اكرامى وسيد عبد الحفيظ يرنهم العلقة التمام,,,, وممكن كمان الوحشين دول يقولو ازاى الامن المركزى يسيب الجمهور الغاضب ده يوصل لجمهور الفريق التانى ويطلع مدرجاتهم و يبتدى يحدفهم واحد واحد من فوق زى الفراخ,,,,, وممكن الناس الوحشيين بردو يقلو ادبهم اكتر من كده و يقولو مين قفل البوابة الوحيدة المخصصة لخروج جماهير الاهلى,,,,,,بس منتهى قلة الادب ان الناس دى تقول مين طفى نور الاستاد بعد دقيقتين من نهاية المبارة,,,,مين؟؟؟؟
وانسب رد على هؤلاء ان احنا نقولهم عيب....عيب اوى الكلام ده علشان اللى عملوا كده من الشعب وانتو كمان من الشعب يعنى المفروض كاخوة فى الوطنية منقفش لبعض ع الواحدة 
اما بالنسبة للناس اللى بتقول ان ده كان عقاب للالتراس على هتافهم ضد العسكر فى اكثر من مباراة فهو بالفعل كان عقاب لكنه "عقاب ربنا" العسكر ملهومش دعوة العسكر كل اللى بيعملوه انهم بيحسبنو على اللى يزعلهم بس لان رجال العسكر من الاشراف حسبنتهم بتوصل فى ساعتها  
وعلى العموم كل الناس دى لو شافت خطاب المشير "اللى قاله بعد ماخد الاصطباحة بتاعت كل يوم"وفهموا المقصود منه صح كان زمانهم خارجين يهتفوا بالروح بالدم نفديك يا مشير لان سيادته اوضح ان الخطة ماشية فى طريقها تمام وان اللى عمل كده من الشعب والشعب هو اللى لازم يربيهم يبقى المفروض الهتاف يكون الشعب يريد اعدام الشعب علشان العسكر ولاد الاشراف يصحوا ميلقوش حد يحكموه فيسافرو بقى على تركيا او مالطة يظبطوا نفسهم وهى دى الخطة اللى ماشية صح 
وبكده يبقى ده اول استشهاد جماعى لشعب باكمله 
اما عن احداث محمد محمود فبعد بناء الجدار المتظاهرين طلعوا اذكياء لفوا ودخلوا من الشارع التانى محمد منصور المشكلة ان الامن المركزى معروفين بذكائهم الخارق ولا استبعد ان يبنوا جدار عازل اخر من جهة محمد منصور و بكده محدش يعرف يدخل ولا يخرج من وزارة الداخلية بس يارب مينسوش هما يخرجوا بره قبل ما يبنو الجدار........يتبع

ربنا يخليلنا العسكر

ليه ربنا يخليلنا العسكر؟؟؟؟؟علشان فى كل بلاد العالم العسكر بس اللى بيموتوا شهداء و هما بيدافعوا عن أرضهم لكن العسكر بتوعنا من كتر ما بيحبونا نفسهم كلنا نموت شهداء و ندخل الجنة.
بيسحلونا ويضربونا ويتبولو علينا وبيكشفوا على عذرية بناتنا "علشان يحافظوا على سمعة مصر"و فى النهاية كل ده فى ميزان حسناتنا المفروض يعنى يعملوا ايه اكتر من كده
ولو كان المجلس سلم السلطة للمدنيين بعد 6 شهور مكنش كل ده حصل ده مش بعيد كانت الناس دى ماتت موتة مش تمام
مكناش هنشوف الجنزورى "بطل مصر فى رفع الاثقال لموسم 43 و44 على التوازى"
.وحكومة الانقاذ اللى المفروض انها جايه تنقذ ثورة"الشباب" واللى بتصرف على صبغة الشعر اكتر ما بتصرف على العيش و البنزين
والسؤال ليه لسه فى ناس ضد حكم العسكر ؟؟؟؟؟
اكيد الناس دى متفرجتش على الاعلامى الكبير الدكتور "ف ايه معرفش"توفيق عكاشة ولا الفنان الكبير عمرو مصطفى ولا شافوا دموع الحسناء الرقيقة الاء نور وهى بتطالب الاغلبية الصامتة بالنزول للعباسية لتأييد المجلس العسكرى
انا شفت كل ده وعلشان كده بقول ربنا يخليلنا العسكر علشان لو سلموا السلطة مش هنلاقى حد يدينا على قفانا .................................
العسكر دول اللى بيأمنوا رحلة العائلة المالكة من بورتو طره لمسرح اكاديمية الشرطة اللى تم تشييده خصيصا لتقام عليه المسرحية الكوميدية الرائعة بعنوان "محاكمة النظام السابق"واللى للاسف الشعب محروم من مشاهدتها
بس اعتب على المجلس العسكرى انهم بيعاملوا الرئيس السابق بمنتهى القسوة و مبهدلينو ع الاخر رايح جاى من المستشفى للمسرح من المستشفى للمسرح كان المفروض يبنوا المسرح جوه المستشفى اللى سيادته نازل فيها بس يكفى انهم موفرين له صبغة الشعر والكوافير و الاكسسوارات علشان شكلوا يطلع امور ويعجب البنات اللى بيتفرجو ع المسرحية
وخلينا نفتكر اننا لسه بنتكلم عن العسكر اللى حموا الثورة اللى قامت ضد الرئيس السابق"بطل المسرحية اللى كنا لسه بنتكلم عنه
لسه بتسأل ليه ربنا يخلى العسكر ؟؟؟؟؟؟؟؟؟؟؟؟؟؟؟؟؟؟؟؟؟؟